Ek stel belangstel in mense en wil hulle graag ondersteun in hul strewe om sinvol te leef en om op kreatiewe maniere te kyk na die probleme wat hulle daarvan weerhou om voluit te leef en hul doelwitte te bereik.

​

Ek was 'n joernalis, 'n redakteur, 'n grafiese kunstenaar en die eienaar van 'n tydskrif. Hoe mense dink, doen, glo en kommunikeer is een van my grootste belangstellings.

​

As bekeerde Christen, glo ek dat elke mens 'n nou paadjie met die Here moet loop om sy of haar lewensdoel te ontdek, selfverwesinliking te bereik en doelgerig en gelukkig te leef.

  

 

WAAROM EK KAN HELP

​

Ek het 'n verskeie kursusse in lewensafrigting voltooi, asook 'n  kursus in berading by Lewende Woord. Aangesien ek 'n graad het in kommunikasiekunde en 'n loopbaan daarvan gemaak het, weet ek hoe mense met mekaar kommunikeer en die probleme wat kan onstaan indien die kommunikasie-proses skipbreuk ly.

​

Ek het in 'n woonstel groot geword, maar het elke vakansie en langnaweek op 'n plaas in die bosveld deurgebring. Ek ken die besige stad, maar is net so tuis in die bos. Ek is deur 'n enkelouer grootgemaak wat slegs 'n klein staatsdienssalaris verdien het en vier kinders daarmee moes onderhou. Aangesien my vader vroeg in my lewe oorlede is, ken ek die probleme wat mans soms ondervind weens 'n afwesige vader en hoe om dié wonde te heel.

​

Aangesien daar nie geld was om voltyds te studeer nie, het ek my ouerhuis vroeg verlaat, weermagdiens gedoen en begin werk. Ek moes dus deeltyds studeer om 'n graad en nagraadse diploma te verdien. Hoewel ek bitter swaer dae beleef het,  het ek ook die liefde en hulp van my ma, broers, susters en vriende ervaar en geleer hoe belangrik dit is om deel te wees van 'n gemeenskap. 

​

Op dertig het ek ervaar hoe dit voel om diep in die skuld te wees nadat 'n onderneming waarvan ek 'n aandeelhouer was bankrot gegaan het. Ek moes planne beraam en hard werk om dié geld terug te betaal. 

​

Ná die koerant waarvoor ek tien jaar as verslaggewer en sub-redakteur gewerk sy deure gesluit het, was ek en baie ander verslaggewers plotselling sonder werk. Om te oorleef moes ek nuwe vaardighede aanleer en 'n nuwe loopbaan bou.

​

Op Gougheiland was ek die kommunikator en het 14 maande met net ses ander spanlede deurgebring. Gedurende dié tydperk moes ek leer om geduldig te wees, ander se foute en eienaardighede te aanvaar en daarmee saam te leef. Ek het natuurlik ook besef dat ek self foute het en dinge  doen wat ander irriteer.

​

Ek is vir 26 jaar gelukkig getroud en het drie dogters grootgemaak. Twee is besig om te studeer en een doen vanjaar matriek.

​

Vir meer as 17 jaar lank was ek die hoofredakteur en eienaar van 'n tydskrif wat werk verskaf het aan sewe ander mense. Dié werk het my toegelaat om baie rond te reis en mense te ontmoet.

​

My doelwit is om ander by te staan in hul soeke na 'n lewensdoel, om moed te skep, om doelwitte te stel en doelgerig na te streef, om van negatiewe en ongegronde gedagtes en geloofkontrukte ontslae te raak, om orde in hulle lewe te skep, hulle volle potensiaal te bereik en volluit te leef.